Separated at Birth

進場時請對號入座

我同人講我係劉美君fans，結果個個當我流，不過fans未必冇樣睇，所謂相由心生，例如我身邊一位很喜愛草蜢的朋友，外貌真的有幾分似蔡一智；而另一位朋友每次看不同的演唱會，更總會應景打扮入場，千變萬化十足cosplay。

最近英國就有位攝影師找來了一批死硬fans做model出影集，睇個look你又估唔估到佢地偶像係邊位？（難度由上至下）。

一係唔review一係一炮過之其4︰toe

我是在演唱會幾天前才認識這隊樂隊的，但在YouTube看過他們的片段之後決定非去看不可。

Post-rock與math rock向來不是自己杯茶，然而toe音樂中的力量及所表現出的美態，卻是筆墨難以形容的，他們在台上的技術，更是超越了人體極限，這一點是當晚所有欣賞的朋友都為之讚嘆的。尤其是鼓手柏倉隆史的昇天失神，如果玩音樂可以達到性高潮，大概就是他這樣子了。

到場後見到全場爆滿針插不下，散場時紀念品攤位人頭湧湧，很替負責主辦、收T Shirt錢收到手軟的M感到欣慰。

一係唔review一係一炮過之其3︰Alicia Keys

相信你也試過︰有些女孩子，是寧願遠觀的，本來印象滿分，開口說話認識之後感覺就變質。

自從MTV Unplugged打後所推出的作品，再跟她做電話訪問，已知道今日的Alicia已不是我當初起喜歡的那個她了。當然她依舊是才華橫溢，但出道時那種不吃人間煙火的純情氣質，早被要跟Beyonce一較長短的歌精舞勁diva級氣派所取代。入後台見了面之後更加後悔，怎麼你會如此世界女？早知寧願唔見。

縱使如此，這個live仍然是我最期待的，因為她上兩次來港演出我都去了旅行。結果實在很精彩，Alicia無一刻欺場，也看得出她下了很多苦功蛻變成如此一個面面俱圓的entertainer。

但始終已不再是我當初喜歡的那個她了。

一係唔review一係一炮過之其2︰Akon

不記得那個rapper講過，無論是新仔玩又好，天王玩又好，所有Hip Hop演唱會的形式都離不開一條麻甩佬在台上成晚口噏噏。

這個觀點我很是認同，因為除了「make some noise」（中間可加入「mothxx fuxkin'」做助語詞）及「put your hands in the air」（也可加「mothxx fuxkin'」），上至Kanye West下Lloyd Banks他們都想不出甚麼其他台詞。Akon當然沒例外，不過他勝在落力通場跑，大熱作也多，最重要還是當晚promoter當party去賣飛，吸引很多索女入場。但我全晚只敢影Akon，因為我怕羞。

一係唔review一係一炮過之其1︰Stereophonics

看Stereophonics讓我想起自己在英國讀書時，獨個兒冒著寒風從宿舍走25分鐘到livehouse，然後一個人拿著啤酒孤伶伶捱過那些難聽的垃圾supporting acts，苦等兩句鐘盼心儀的樂隊上台那些日子。

不，Stereophonics不是那隊心儀樂隊，而是那些垃圾。多年來我認定這樂隊名過於實，只有那些讀大學的麻甩仔在pub飲大兩杯攬頭攬頸才會覺得好聽，是名副其實的ladrock。但這班客仔在英國人數之多，已足夠令Stereophonics張張碟都賣No.1了。

看完他們的live依然沒有改觀，這隊垃圾無才華、無好歌、無特點、無進步，假若不是在場內遇到幾個朋友（其中一個悶到走出去大堂hea），我真的不知怎撐足全晚。

一個別開生面的群星演唱會

不少朋友投訴香港的演唱會愈趨公式化，只是他們沒有留意其他選擇罷了，例如這個由某化妝學院舉辦的化妝比賽暨catwalk表演暨image girls/boys選美暨演唱會，就是其中一之。

首先擔任司儀的有影壇奇葩梁焯滿，他跟顏千汶拍戲你睇得多，做司儀實在難得一見。另一位有線旗下的余思敏在界人氣甚高，並有「翻版胡杏兒」之稱，網上討論區常有「余思敏至廢金句 」題目，與梁焯滿應會擦出火花。

至於掛頭牌演唱的是戴辛尉，由於其父是香港音樂教父戴思聰，加上其姊戴蘊尉有金曲《我係小忌廉》，如當晚戴辛尉能夠代為演繹，已經值回票價。其他歌手方面，有在網上始終找不到其資料的華籍男星Alan Freedom，以及Yeti與Kenneth兩位新名字，相信有期待驚喜。另外大會又邀得「小室徒弟」Zoie 譚凱琪擔任評判，認真唔野小。

這個在尖東日航酒店的表演（不是鳥巢啊!!），唯一缺點是票價太貴，要收$250，我認為入場者獲大會回贈$250現金，再包自助餐，就合理得多。

This is so fucking 90's

昨日跟M閒聊，我突然講起某種打扮「好90年代」，他笑了出來。我想是因為很少人這樣講，通常別人都是講好「好70年代」或「好80年代」，也許覺得90年代實在太近。大佬！07年啦！90年代成十幾年前啦！

但成長於90年代的人如我，有陣時還是甩唔到那個時代的東西，因此早兩日的Q Awards，我仍是很關心的（Ian Brown及Richard Ashcroft竟仍然有獎攞，你話成件事幾90's）。

Ian Brown又著Neighborhood，不過如果個個月免費寄衫俾我，我又唔介意落街放狗都著囉！另外我偶像Damon Albarn不單止多左頭髮，最近仲清減後生靚仔左，不枉我咁愛佢；Richard嫂、一代毒后Kate Radley點解有麒麟臂？不過如果生左兩個兼戒埋毒，變肥師奶都唔出奇；至於Kylie依舊咁正。講完，大家唔該返翻嚟21世紀。

翻生

死過翻生的人，所做的事往往值得去領會。像我的偶像Edwyn Collins，幾年前患上腦出血，病情反反覆覆，直到最近才漸漸康復過來，並著手處理病前所錄低的新歌。最近聽了他放在MySpace的新作〈You'll Never Know〉，驚為天人，因為我沒想過，應該說不可能想到，原來Guitar Pop、soul、及dub是可以混合在一起的。起初看見他的宣傳照很是心痛，樣子像老了10年，頭髮脫得疏疏落落，貌似得返半條人命（Edwyn在網頁上也笑稱自己有107歲）。但聽到曲中他那的清爽醒神的結他，教我相信只要活著，事情會是美好的。

Michael Jackson VS Prince

歷史上除了「教父」James Brown之外，相信沒有人能夠有此地位及膽量下令MJ及Prince作出即場對戰︰結果MJ使出了很強勁但頗正路的招數；Price則一貫地以怪招突圍，惟招式章無雜亂，也叫人摸不著頭腦（尤其是玩mic stand及忽然無啦啦除衫嗰兩下，真係唔知究竟想點）。本人愚見認為今次一戰各有所長，未分高下，James Brown可謂攞黎搞。

買同唔買的猶豫

想買的原因︰

- 好靚
- 好平（平到唔好意思講幾錢）
- 好抵，以咁嘅價錢竟然有埋震臂
- 好聲
- 好型
- 好襯我
- 牌子唔錯
- 隻色好特別好難搵
- 玩清新/懷舊音樂好應該有一支大肚腩結他
- 屋企果支老冧別人的Fender Tele唔啱錄新碟

唔想買的原因︰

- 冇錢
- 冇錢
- 冇錢
- 好少彈電結他
- 好想有人同我夾嘢但一直搵唔到人
- 唔知隻新碟錄唔錄得成
- 唔知仲有冇show出
- 要大肚腩錄新碟其實可以問人借
- 電結他好難打理
- 阻定
- 冇錢

Neverlasting Love Songs

Nick Hornby的作品，我只看過改篇而成的電影，最喜歡當然是《High Fidelity》，作為樂迷，我也會將愛情代入音樂之中，夾硬令成件事更浪漫及感性。

最近終於初次看Nick Hornby的散文《31 Songs》，感覺不是太好，首先因為Bruno借我的這本是台灣中譯本，譯得非常差勁，言詞之累贅，不單令Nick的幽默文筆蕩然無存，涉及音樂的細節，更令人眼睛疲勞。其次，是因為Nick書中所寫的歌，不是我沒聽過，就是全無感覺，像他說可以一日聽上百次、Bruce Springsteen的〈Thunder Road〉，我只覺難頂。

雖然讀了幾章我已決定放棄看下去，但我這本書的體裁實在不俗，未來日子我會嘗試在這裏寫我自己的版本，就叫《Neverlasting Love Songs》。對喜歡音樂的人來說，每首深愛的歌，都是生命某個章節的配樂。有時幾個音符，一兩句歌詞所帶來的回憶，比你腦中所儲存的更實在。

P.S. 順帶一提，最近家中添置了三合一printer，原來好好玩的，這張封面相就是它scan出來的，幾靚呀可？

Incidental music

又係由於工作關係，好耐冇update個blog，但各位放心，我仍然健在。

今個夏天俾我最大嘅啟發，除咗知道skinny style喺7、8月香港完全唔practical之外，就係好多人都冇用止汗劑嘅習慣，因此我每日返工所搭嘅火車同地鐵，總出現大批「狐人」。

某晚我放工坐地鐵邊聽iPod，車廂又傳來一陣刺鼻臭狐味，點知同一時間，耳筒中傳來嘅竟然係呢首歌，每句歌詞都訴說緊我當時嘅處境同心聲。

音樂，有時就係咁神奇。

Bo-he-man Rhapsody

'Cause This Is Thriller

坐監唔一定淨係打籃球同康樂棋，好似菲律賓宿霧呢間監獄咁，閒時會叫1,500個囚犯一齊跳Michael Jackson嘅《Thriller》，舞步跟足原裝MV不特止，最爆係搵嚟一位基佬倉友戴Bra扮女主角。另外下低嘅印度版《Thriller》，未睇過真係唔好錯過!

淫亂一族傳人

輯相由Terry Richardson揸機（試問仲有邊個?），男嗰位係The Blondelle主音Will Blondelle，女果位多嘢講少少，Daisy Lowe，18才，最近被譽為「The New Kate Moss」（不過二人唔妥），設計師Pearl Lowe個女。戲劇在去年驗DNA，先發現原來佢老豆唔係Pearl條佬、Supergrass鼓手Danny Goffey，經手人原來係Bush主音Gavin Rossdale，激到佢現任老婆Gwen Stefani發癲。點解無啦啦驗DNA呢又？因為當年Pearl同Danny成日同Jude Law同Sadie Frost兩公婆玩換妻嘛!

都好嘅，Pete同Kate已經睇到厭（巧合在二人由Pearl一手撮合），呢pair有新鮮感又肯除衫，不過暫時仲未夠喪。

呢幫人實在好淫亂，令我更加想做band仔/攝影師/Jude Law。

都有用兩秒諗過的The Hacienda x Y-3 x Peter Saville

同以前老尖嘅Canton同Nova一樣，The Hacienda只係一間執咗笠嘅的士高，當然就傳奇好多︰當年幕後老細係Factory同New Order、娜姐首次訪英喺嗰度演出、Happy Mondays晚晚響嗰度賣E搵真銀，Peter Saville誇到話間嘢係「90年代誕生地」。前幾年The Hacienda清拆，連地板都可以拎出嚟拍賣，今次同Y-3出鞋掠水又有幾出奇？

感覺上比New Balance嗰對好少少，對鞋本身就點都稱唔上靚，但用色算用腦度過︰三間用上The Hacienda招牌黑黃間，鞋身則用上club牆身獨有嘅粉藍，反而個盒更有誠意，盒面印有Factory catalogue號碼FAC 51，盒形同The Hacienda舞池地板形狀一樣，至於包鞋果張紙，Peter Saville話係The Hacienda顧客非常熟悉嘅物料，應該係捲大麻嘅煙紙掛？

諗頭係有嘅，但斷估有錢都買唔到，對鞋限量250對，又要淨係曼徹斯特分店先有售，New Order班友一人一對，Ian Brown同Mani又各一，Happy Mondays又分咁啲出嚟自己炒，咁搣搣吓有幾多淨嘞你話。

當然不能沒有音樂

我仲未至於齋買衫嘅，今次都有去涉谷睇結他，行Tower亦行到腳軟，不過冇乜驚喜發現咁解，呢幾張碟都係一早打算要買嘅items。

聽聞傳說中嘅《Fifth Avenue Band》好一段日子，據知呢隊樂壇影響山下達郎第一隊樂隊Sugar Babes甚深，但聽過後並無想像中咁soulful同melodic，普通一隊70's soul rock band，仲要返到黎Bruno兄話佢新星堂減價時早已入手，仲只係$20，頂!!

Roger Nichols同Paul Williams曾被視為Burt Bacharach及Hal David接班人，二人曾為The Carpenters寫下不少金曲，包括〈Rainy Days and Mondays〉及〈We've Only Just Begun〉等。Roger Nichols旋轉鋪排自成一格，以前佢隊soft rock樂隊Roger Nichols & the Small Circle of Friends足已證明，成為作曲人後更作品更同A&M Studio獨有溫暖音色匹配得天衣無縫。呢張碟係佢同Paul Williamsdemo合輯，後者兼負責主唱，鍾意A&M Records必備。

Flying Rhythm係「日本dub神」內田直之嘅敲擊樂團，佢負責mixing，另外兩位成員則分別玩鼓同Conga，總之成隻碟淨係得鼓聲同dubbbbbbbbbbbb音效，只限hardcore dub迷only。呢隻最新大碟仲送埋Tower Record特典live album，正!

被譽為「一人Beatles」、「Paul McCartney再世」嘅70's唱作人Emitt Rhodes，以前都問Bruno兄借過，今次自己買返，點知買完上網check返先知原來唔止有美版，有隻新精選仲有齊哂呢隻碟嘅歌，再加佢第二同第三隻碟嘅佳作。算啦，因為樂評普遍都話佢呢張碟最值得聽。

Tee迷必睇

最箍band tee

自從上次件The Warlocks tee條領箍到上喉核之後，對band tee有點意興闌珊，不過剛才上了NME睇貨，又再有點兒心動（你估中了，我是好易心動的）。

首先The Horrors那件Boot tee上次已經想訂，原來他們最近出了另一款成身蝙蝠的，圖案有點似用原子筆畫，但穿上身我想未必好看吧？至於CSS則款款都靚，但顏色方面比較女仔，我知月鳥兄買了其中一件，但暫時未見佢著過，不知效果如何呢？還是等佢做完白老鼠先再決定。至於今年盛傳重組的Black Flag，最近見到日本雜誌有不少人支持，原來他們的出品款多又正，這一款好鬼Neighbourhood，但又正過Neighbourhood。

不過最吸引，還是Crystal Castles的爆眼娜姐tee，早前在《ID》已經見過，剛才見識完樂隊的音樂更加想要，不過睇相，似乎又係十分箍頸，呢個死穴究竟有冇得搞o架？