終於為國增光

拉丁佬同俄羅斯佬都出埋，今次《GTA》終於輪到我地中國人。系統首度移植NDS兼用上遠鏡視點，唔知玩唔玩得慣，如果變左tactics野就更加唔識玩，龍與鳳要明年一月先知。

可能你會嫌啲中國人角色樣設計得好核突，但唔怪得佢，如果你有去過NY唐人街，就知道其實已經畫得佢地靚咗。

四揀一

本人買褸一向唔手軟（如果買樓都可以咁就好），雖則話下個月去到日本唔會再買貴衫，但褸呢樣野好難避免，暫時候選有呢四件，諗住四揀一，未睇實物已經好難取捨。

Pledge MP Jkt（UL）
正︰相對地抵買，個色好靚。
唔正︰上季已經買左佢一件95%同款的；今季呢件質地渣渣地；好凍先著到。

Whereabouts x Wrangler Denim Jkt（UR）
正︰易襯，任何季節都著得。
唔正︰貴到冇譜，牛仔褸o者使唔使去咁盡？
P.S.︰其他牌子如BRING ON THE NOISE及Inpaichthys kerri都有類似款，但cutting冇咁得。

N.Hoolywood x Lee Jkt （LL）
正︰個色幾正，有收藏價值，相對地抵買。
唔正︰個cutting好七下，又係好凍先著到。

Discovered Pu Leather Jkt（LR）
正︰好鍾意個色，仿皮造得極真，易打理。
唔正︰仿皮來講標得好貴，呢個牌子全東京只是原宿Beams有賣，但我自己去親都唔多覺眼。

最唔正︰美國經濟唔知仲有沉幾耐，美元係咁跌即係yen係咁升，再變8算的話就只能買Hanjiro了。

Best Of The Month

一直很喜歡Sonic Youth的《Goo》封套，早前在M介紹下才從《Hugh》知道設計封套的藝術家叫Raymond Pettibon，Blag Flagk大部分封套都是出自他的手筆。幾日前見到公司的同事帶住一個《Goo》的環保袋，原來是Marc Jacobs Summer 08 Show的禮物，同事見到我喉擒的樣子爽快地說︰「俾你啦，不過用過噃!」已經用了好幾天，如果襯埋件《Goo》Tee出街會唔會好爆?? Anyway, a million thx to Michelle!

然後是等了好久的iPhone 3G，為了等她我三年來沒有換過電話。果然名不虛傳，簡直是史最偉大的gadget!!!以後真的可以唔帶袋出街仍然有電話用有歌聽有機打有相睇有網上有戲睇。

最後是N Hoolywood的e-Mook，當然不是為了件tee而買啦，不過可穿性實在高過上次《Dazed n Confused》果件好多! 這本特集真的很詳盡，08 a/w、standard以至under summit wear系列完全大解構，稱得上是NH的聖經，因此貴貴都買左先，況且都唔係好貴。

買條Dickies都一鑊泡 Pt. 2

承接上集劇情︰我在東京試過了接近10條Dickies及疑似work chino，包括1. Dickies x American Rag Cie的M碼，結果又是細碼太窄中碼太闊這種令人激心的情況；在Freak's Store試了第一代的Low Rise版，結果原來闊到飛起；在Jeans Mate試了Low Rise Smart仍然係比想像中闊好多。

當中也試過不少代替品︰例如Gap的Extra Slim Fit Chino，Wyman著就可能slim；在Freak's Store隔離鋪有Ciaopanic的Ciaopanic x Wrangler，質地硬到界啫；在STUDIOUS試過DEVOTION的出品，cutting好靚質地還可以，問題是唔會俾1,4175 yen買這些4線牌子；算啦貴少少買Whereabouts但去到只賣剩短褲版，但好似來季繼續出；在原宿CANNABIS有CANNABIS×Dickies，標得貴之餘只有黑及灰，我要卡其色呀!!

結果，我在臨離開東京前的1小時，在新宿nano・universe GROUND FLOOR終於找到了nuGF x Dickies（左圖），先試S碼都係超窄但比American Rag Cie那條舒服，再試M碼則明顯太大。再著住條S做出各種測試包括行企坐低，當時覺得窄身程度應可接受，由於冇時間再搵再睇再試再考慮，在「仲唔買就冇Chino著」的壓力下終於惟有俾錢。返到來香港，唔知肥左定點，個hip位窄到痺（真係個pat感到麻痺!），白白擺左幾個月最近終於決定放售。

你有冇見過人咁七買同一款褲都會買錯兩次!! 打開今期《Popeye》有頁介紹Dickies，6條當中我已經買過兩條，但仍然搵唔到啱心水仍然冇得著出街。

天無絕人之路，Dickies自己又推出最新型號名為Low Rise IVY（右圖），是Low Rise Smart的修腳變種，聽個名都知係食 Ivy/Preppy/ American Trad條水，價錢只是8,400 yen，沒奈何地已成為10月之行鎖定目標之一。

玩物喪志

有聽過《兇群出洞》 (Willard) 這齣戲嗎？講主角是自閉變態佬，能夠控制老鼠咬人（甘國亮主演的蛇殺手好明顯照抄），那為甚麼世上有這種變態佬呢？答案是因為他們小時候經常去IKEA買玩具玩。IKEA 不單有恐怖死老鼠公仔供小朋友選購，還有甩眼曱甴、蜘蛛及穿上粉紅色襪的女性斷肢公仔等等。自此每次讀到北歐有禁室培育狂魔的新聞，我都不覺得出奇。

買條Dickies都一鑊泡

近一年打開各大潮流雜誌，你會發現Dickies成為了必要不可欠的定番單品，不單連野口強都穿上Low Rise版襯N(N) Boot出席Paris Fashion Week，就連各大Select Shop都推出自家collabo的Dickies Work Pant，上ZOZO search 「Dickies」一字，就可以找BEAMS、時Shirazu、甚至SHIPS再xGRIME EFFECT的collabo，由剪裁顏色細部位五花百門，令人眼花撩亂。

當中最搶手，莫過於號稱每季都出、一出都賣斷的Dickies x American Rag Cie Work Pant (左上圖)。本人去年曾經擁有過一條卡其色的，的確由cutting至質料都無懈可擊︰極細身剪裁、褲內邊的繡花細部位（右上圖）、全黑色的拉鍊，造工叫我愛不釋手。只有一個遺憾︰就係我唔啱著，訂細左個碼。FUCK。

終於唯有割愛予一位啱著的友人，結果？佢愛條褲要愛到再訂多條黑色!月前我托另一友人為我們在日本代購，但今季卡其色已經soldout，我友人條黑就幸運有貨。點知收貨後，發現今季條褲質量大插水，不單布料渣咗好多，全黑拉鍊冇咗，仲要加埋價，算點先？

另一邊廂，Dickies近日將其自家Low Rise版作出改良，演變成Low Rise Smart Work Pant（下圖），cutting其實抄足American Rag Cie，細部也比較Hi End，最仲要是價錢平一截!! 點知Rag Cie近來又返翻貨，叫人過兩日去到點取捨啫？不過最近自己對灰色都甚有好感，大有可能各來一條，返來慢慢著下比較。

又不過，曾經見過Men's Non-no有Dickies x nano‧universe，好似仲靚（記憶定價是再高一點），另外還有Gap的Extra Slim Fit Chino，真係要好好身親比較衡量。

Favourite Skirt (Boy Meets Girl)

你不要自以為在理工附近出沒，就可以扮正時裝設計系學生；就算你真係時裝學生，以你6呎高的身驅以及極粗豪的差佬髮型，也不應該著裙吧？okok，就算你著裙，你都唔係搵對勁Vintage的NIKE來襯吧？而你那副白色的眼鏡及腰上的Gucci腰包（Sorry 我影不到），令我那一刻極想推你出馬路。

正如《Blades of Glory》的Chazz話齋︰「You look like a 15 year old girl, but not hot!」

出晒事

有時都恨留長頭髮，也不是要紮馬尾那麼長，只要one-length遮住面上的肥肉就可以了，但現實已經不容許，幸好在grunge那個年代留過一次，算不枉此生了。

但若然你有很多頭髮的話，也不一定適合留長的，也要考慮自己個樣。就好像這一位，難道他照鏡時不覺得出晒事嗎？

話時話，你認得出他是誰嗎？

3rd Leg︰Paris

巴黎最令我期待的活動，當然是去著名潮店Noir Kennedy買April 77，但通常凡事就係咁仆街同老土︰期望愈大失望愈大。

先講點去︰地鐵站是St Paul，離市中心非常近（好彩冇搭的士），店舖就在地鐵大街出口過馬路行入一條街，非常易找。原來Noir Kennedy在那條街上有兩間鋪，較大的一間主要賣女裝、古著及特價貨，另外較細的就是我們平時在《Men's Non-no》見到的那一間，賣男裝為主。講陳設，兩間鋪都無敵，女裝那一間有點像爛pub，入面有波子機，更衣室都用舊式電話亭改建，又暗又嘈；男裝的一間麻雀雖小，但天花吊著（我希望是假）的死老鼠實在壯觀。鋪本身沒有失望，到頭來當然是人的問題。

說到底是我的錯，因為Noir Kennedy並非潮店，而是一間punk shop，女店員不是螢光色頭髮就是滿面穿環，眼神充滿唔想撈的怨氣，見他們的身世已不期望獲得賓至如歸的服務。叫她們搵size，好似欠佢咁，問佢有冇其他色，她便死死地氣用極流利極快、亦只有她自己才聽得明的法式英文向你解釋一番「%^&(**()^$>?<+^#!..<":?....冇喎!」去到男裝的一間，試褲時貨是從閤樓扔落地下的（真係扔到澎澎聲!），而且該店沒有試身室，只有一個屏風幫你遮一遮，由於冇心機試，我又買錯size。這間店員算有禮貌，收完錢肯冷冷地講聲多謝。

最老襯，就係買完返春天百貨集合，原來所有April 77的basic款都有售（斷估我都唔會買SM PVC同豹紋款啦!），每條只是貴5歐元，車錢都係返度。而且春天百貨的貨仲快過Noir Kennedy，秋冬的冷衫及麻質西裝也已經有售，不過後者標成300幾euro，呢個牌子似乎玩大左。

很滿足的一天

很久沒有跟G及M兩個麻甩佬行街，展開一次由早到晚的物慾之旅。

早上我們大伙兒去被M稱之為「黑社會地下工場」的地方配眼鏡，我只負責帶路。明明配一副眼鏡只要20分鐘，但他們二人姿姿整整亂吹水成件事竟搞足一個上午!!!

飯後，他們陪我去信和搞兩件事，離開時我有了一部可以（暫時）玩盡所有下載遊戲的PSP，以及一隻令我愛不釋手的Omega Seamaster古董錶，最叫人難以置信這錶是完全免費的，純粹是親情及友情的見證。

之後跟M去了老連掃場，竟獲得心儀品牌（因為從來冇買過）Lounge Lizard的秋冬catalog一本，早前去日本都拎唔到，今季設計走60's英倫賭徒風格，新意欠奉，又係減到5折先再諗。

最後去了H&M，買了一個平靚正呃得下人兼size大到無倫的3-way bag，正適合下星期歐洲之旅上機之用；另外最近好想買一些帶有rock味的古著風tee，這全店只剩一件又合size，決定買埋。

回家路上食埋非常困難先食得到「的群記清湯腩」，回家後又收到通知明天不用回公司，全天優閒出勤，都好耐冇一日如此滿足了。

買同唔買的猶豫

想買的原因︰

- 好靚
- 好平（平到唔好意思講幾錢）
- 好抵，以咁嘅價錢竟然有埋震臂
- 好聲
- 好型
- 好襯我
- 牌子唔錯
- 隻色好特別好難搵
- 玩清新/懷舊音樂好應該有一支大肚腩結他
- 屋企果支老冧別人的Fender Tele唔啱錄新碟

唔想買的原因︰

- 冇錢
- 冇錢
- 冇錢
- 好少彈電結他
- 好想有人同我夾嘢但一直搵唔到人
- 唔知隻新碟錄唔錄得成
- 唔知仲有冇show出
- 要大肚腩錄新碟其實可以問人借
- 電結他好難打理
- 阻定
- 冇錢

真係好少可睇中呢.......

我係一個好難買袋嘅人，一來係唔捨得買，二來覺得男人拎咩袋都唔好睇，三來係根本唔鍾意帶袋。記得有段時間一個袋都冇，於是出街有嘢拎時，就用購物膠袋或紙袋（當然太樣衰嘅唔會用，多數用日本Tower Records黃袋，Cisco同Disk Union等等，幾fashion架其實），點知俾同事話我係「秋葉男」，即係依家嘅「電車男」。

不過最近真係搵到個幾想要嘅袋，就係吉田以戶外音樂節為concept嘅Porter Jam系列，其實一早已經覺得個Messenger Bag好靚，因為銀得來爛爛地，搶得來唔會太揚，Hi-End又得古著又得Outdoor都得，乎合我完全唔襯衫、5分鐘出得門口嘅條件。

價錢都唔係問題，Porter一向咁上下，煩在呢條line係直營店限定，仲要依家預約，9月先有得攞貨，好似customize個Goyard都冇咁煩。訂就唔訂啦，各路朋友，香港返行貨通知我呀!!

送別了Cheap Monday

我條 Cheap Monday Italian Unwashed，早排不幸出事。本來我都有嘗試過用自己雙肶「勸」返大條褲，但效果一般，於是決定賣咗佢算數。

估唔到提交一日，條褲已經搵到新嘅主人，轉會費仲非常之唔錯，在此多謝各位友好之前憂心。

我仲諗緊買唔買過條，定係9 月去巴黎買條April 77先再算呢？

鍾意佢夠爛

條Cheap Monday縮到變絲襪

阿森一族殺入花唇界

講開《The Simpsons》，明星客串變成佢哋啲樣見得多，時裝設計師記憶中真係冇玩過。新一期《Harper's Bazaar》同《The Simpsons》crossover，Linda Evangelista、Donatella Versace、JPG、Marc哥同Viktor & Rolf全部阿森化，當中Homer扮Karl Lagerfeld最無得頂，最勁係畫入佢哋著啲衫，全部都出自該設計師手筆，件件都堅o架!

都有用兩秒諗過的The Hacienda x Y-3 x Peter Saville

同以前老尖嘅Canton同Nova一樣，The Hacienda只係一間執咗笠嘅的士高，當然就傳奇好多︰當年幕後老細係Factory同New Order、娜姐首次訪英喺嗰度演出、Happy Mondays晚晚響嗰度賣E搵真銀，Peter Saville誇到話間嘢係「90年代誕生地」。前幾年The Hacienda清拆，連地板都可以拎出嚟拍賣，今次同Y-3出鞋掠水又有幾出奇？

感覺上比New Balance嗰對好少少，對鞋本身就點都稱唔上靚，但用色算用腦度過︰三間用上The Hacienda招牌黑黃間，鞋身則用上club牆身獨有嘅粉藍，反而個盒更有誠意，盒面印有Factory catalogue號碼FAC 51，盒形同The Hacienda舞池地板形狀一樣，至於包鞋果張紙，Peter Saville話係The Hacienda顧客非常熟悉嘅物料，應該係捲大麻嘅煙紙掛？

諗頭係有嘅，但斷估有錢都買唔到，對鞋限量250對，又要淨係曼徹斯特分店先有售，New Order班友一人一對，Ian Brown同Mani又各一，Happy Mondays又分咁啲出嚟自己炒，咁搣搣吓有幾多淨嘞你話。

築地

假如不是被首次遊日的同行友人老屈，我自己打死都唔會晨早起身搭半粒鐘車去築地食壽司。結果同想像一樣，個市場又濕又污糟，最出名嗰兩間門外勁打蛇餅（其實都多日本人，不過佢地排吞拿魚飯店），仲要全部都係七嘴八舌港客，呢啲嘢我喺香港仲受唔夠? 最恐怖，就是睇見「同胞」啲超級侯擒樣︰「哎呀終於有人食完出嚟!」、「我入去一定要食N件海膽」等等，總之失禮到極點。

我去到塊面當然黑到冇朋友，好彩︰1.原來唔使等好耐，其實愈早去愈要喪等，9點去預等兩粒鐘，我11點去只需要等半粒，我走時12點完全唔駛等，但若你堅持愈早愈「新鮮」咁冇得好講；2. 真係幾好食，壽司超肥超大舊，不過好遊客feel，有晒英文餐牌，全店港客大聲廣東話高談闊論shopping戰績，總之唔好期望有地道風味；3. 築地啲紀念品店舖都幾有特色，例如有多款依家港女好興的pattern水鞋，心口印住大大個「魚」字嘅tee，吞拿魚匙扣等，最正係有幾件勁new rave嘅閃jacket。當見識下囉，但以後唔會再去。

此君信唔過

每次行Tokyu-Hands總有驚喜發現，今次就計有顯示穴道按摩位置的狗仔衫，及full gear黑蜘蛛俠派對cosplay服等等。在我購買洗牛仔褲專用液的時候，無意發現了這個工具︰這個名為「remekun」（即「remake君」的意思，懶係cute），是一個專門用來整殘牛仔褲等衣飾的物體，以customize vintage效果。包裝紙背後清楚介紹了用法，如何製造披口、貓鬚及走線效果，總之講到天下無敵。

問題是我由細到大勞作天份甚低，加上呢舊嘢成劈泥咁，完全冇辦法說服我俾錢。1,260yen事少，搞「wor」條牛/對鞋大鑊。DIY精神我一向唔buy，真係俾你刮兩刮就掂，人地LVC仲使開門做生意？

買得最開心，始終還是鞋帶。Tokyu-Hands齊備各類各色鞋帶，必買是可以令Converse即時變hi-end的圓身幼鞋帶，雖然ABC MART都有，但Tokyu-Hands較易買到高筒用的150cm長度。

這樣買Audi才對

講開工concept shop，UT行過兩步就可以見到去年尾才落成、好勁的Audi Forum Tokyo。這個日本人稱之為「冰山」的建築，入面不時會搞大型宣傳活動，其中包括「Audi MUSIC meets ART」的live event。

假如有日自己買得起Audi，也希望能夠在如此有氣勢的總壇做大豪客，而不是像以前返九龍灣公司隔離那間所謂爛鬼showroom。由於座o野實在太型，禁不住走過對面街為它留影。（其實過對面睇Hysteric啫!!）