Separated at Birth

夏日清涼飲料

基於工作關係，月尾我係好少update個blog的，久違大家了。

早前去日本，在表參道一間cafe嘗試了一種非常美味的飲料，最近在家中DIY炮製，接近8成水準，現介紹一下。

楓味豆汁

材料
無糖豆漿一品脫（由於本人在英國生活過，比較喜歡用pint）
加拿大楓漿適量（睇你鍾意幾甜）

做法
其實就係將楓漿倒落豆漿搞勻

秘訣
1. 無糖豆漿可用維他，平靚正。
2. 楓漿一定係要加拿大出品，色澤愈濃愈好，千祈唔好用錯平時食西多嗰隻金黃糖漿。
3. 楓漿其實係冇想像中咁甜的，因此落嘅份量不能少，好似相中嘅半pint份量，就要落三樽蓋，先會飲到楓漿香味。
4. 有時間的話，可以用煲烹下豆漿先，因為呢個飲品係愈濃愈好味的，如果以一pint來計，大概滾後再煲4分鐘，先至再加糖漿。

The Art of Snake Bending

今次日本之旅，有趣嘅事講得七七八八，最後想講嘅係︰屈蛇。（恐防你太純情唔明，屈蛇即係在別人的酒店房中過夜，通常係三個人夾硬住雙人房）基本上我平時出親trip都係入住5星級酒店，今次亦冇例外，但最後幾日因為budget關係，需要屈蛇，因而獲得以下心得。

- 如果一早諗住屈蛇，最好揀人流比較多，大堂又大嘅酒店，例如新宿Prince。假如間酒店lobby靜英英又少人，好易被職員發現，我今次屈的是Hotel Kent ，是屬於難度較高的層次。

- 絕對唔好同你屈蛇的房友同時出入，酒店職員唔係傻仔，佢地一睇你三條友一齊出入就知係屈蛇。最好出入時你有你走先5-10分鐘，然後另外兩位朋友殿後，就冇咁覺。

- 有啲front desk職員好醒目，見你離開酒店時會叫你放低鎖匙，此時對策係用極流利同極快（最緊要快）嘅英文示意你朋友仲喺房，佢哋反應唔切又奈你唔何，咁就過骨。

- 你一條友返酒店時，亦有可能會被問你做乜上樓，搵幾號房等等，咁你此時不能求其講，因為有啲房可能根本冇人住，佢哋兩秒就check到，總之要事前確定你講的房號是有人住的。

- 一間酒店平時咁多人出入，加上佢地分早晚班，職員冇可能記得晒你係咪住客，只要出入時唔好鬼祟，當正自己喺度住就唔會有人懷疑。

- 無論幾高級嘅酒店，個地下一定好污糟，新宿嗰啲更加極級dirty!! 因此千祈唔好就咁瞓地毯，極可能有蝨! 搵毛巾墊都唔係辦法，正解係去「激安之殿堂」買一個睡袋，只需要2000yen，最緊要係已經好暖，唔需要問酒店拎多張毯（另一惹人懷疑之舉動）。因為平，走時唔拎都唔會心痛，不過我個喼完全唔爆，所以拎返香港。

- 自製枕頭方法︰通常你會有一大袋乾淨/污糟衫，將佢地用膠袋入住，外層再包住日本酒店房必備的和服睡衣，就有枕頭瞓。

- 另一算死草心得︰好多時我地每晚臨返酒店，都會買支大號綠茶當水飲。事實上如Kent，走廊度有免費茶水機同製冰機任用，只要拎房中的大茶壺出去斟大量冰同大量茶，就會有非常非常好飲嘅免費冰凍綠茶品嘗。

- Check Out時係最後關頭，千祈唔好功虧一簣。辦法又係一樣，你一條友走先10-15分鐘，千祈千祈唔好拎行李，之後其餘兩個fd先check out，到時佢地拎幾多個喼，都唔會有人問。

我知呢個post好無聊，by the way，祝你地大家呢世都唔使屈蛇。

築地

假如不是被首次遊日的同行友人老屈，我自己打死都唔會晨早起身搭半粒鐘車去築地食壽司。結果同想像一樣，個市場又濕又污糟，最出名嗰兩間門外勁打蛇餅（其實都多日本人，不過佢地排吞拿魚飯店），仲要全部都係七嘴八舌港客，呢啲嘢我喺香港仲受唔夠? 最恐怖，就是睇見「同胞」啲超級侯擒樣︰「哎呀終於有人食完出嚟!」、「我入去一定要食N件海膽」等等，總之失禮到極點。

我去到塊面當然黑到冇朋友，好彩︰1.原來唔使等好耐，其實愈早去愈要喪等，9點去預等兩粒鐘，我11點去只需要等半粒，我走時12點完全唔駛等，但若你堅持愈早愈「新鮮」咁冇得好講；2. 真係幾好食，壽司超肥超大舊，不過好遊客feel，有晒英文餐牌，全店港客大聲廣東話高談闊論shopping戰績，總之唔好期望有地道風味；3. 築地啲紀念品店舖都幾有特色，例如有多款依家港女好興的pattern水鞋，心口印住大大個「魚」字嘅tee，吞拿魚匙扣等，最正係有幾件勁new rave嘅閃jacket。當見識下囉，但以後唔會再去。

當然不能沒有音樂

我仲未至於齋買衫嘅，今次都有去涉谷睇結他，行Tower亦行到腳軟，不過冇乜驚喜發現咁解，呢幾張碟都係一早打算要買嘅items。

聽聞傳說中嘅《Fifth Avenue Band》好一段日子，據知呢隊樂壇影響山下達郎第一隊樂隊Sugar Babes甚深，但聽過後並無想像中咁soulful同melodic，普通一隊70's soul rock band，仲要返到黎Bruno兄話佢新星堂減價時早已入手，仲只係$20，頂!!

Roger Nichols同Paul Williams曾被視為Burt Bacharach及Hal David接班人，二人曾為The Carpenters寫下不少金曲，包括〈Rainy Days and Mondays〉及〈We've Only Just Begun〉等。Roger Nichols旋轉鋪排自成一格，以前佢隊soft rock樂隊Roger Nichols & the Small Circle of Friends足已證明，成為作曲人後更作品更同A&M Studio獨有溫暖音色匹配得天衣無縫。呢張碟係佢同Paul Williamsdemo合輯，後者兼負責主唱，鍾意A&M Records必備。

Flying Rhythm係「日本dub神」內田直之嘅敲擊樂團，佢負責mixing，另外兩位成員則分別玩鼓同Conga，總之成隻碟淨係得鼓聲同dubbbbbbbbbbbb音效，只限hardcore dub迷only。呢隻最新大碟仲送埋Tower Record特典live album，正!

被譽為「一人Beatles」、「Paul McCartney再世」嘅70's唱作人Emitt Rhodes，以前都問Bruno兄借過，今次自己買返，點知買完上網check返先知原來唔止有美版，有隻新精選仲有齊哂呢隻碟嘅歌，再加佢第二同第三隻碟嘅佳作。算啦，因為樂評普遍都話佢呢張碟最值得聽。

黐撚線

前輩金成講過，搞好創作，某程度上要「黐撚線」（他本人就是人辦），日本人在這方面成功，從此事可見一班。

某日出新宿車站，竟然有政府部門頒獎俾個人扮嘅小飛俠，仲要有人幫佢預錄咗段懶cute嘅卡通聲謝詞，仲要台上班達官貴人個樣喪認真扯埋國旗，你話佢地幾「黐撚線」!!

我最諗唔通，係小飛俠究竟幫新宿立過咩功，你話佢平時見到啲「夜王」見鑊打鑊就話啫!!

下次頒埋俾拳四郎吖笨!!

此君信唔過

每次行Tokyu-Hands總有驚喜發現，今次就計有顯示穴道按摩位置的狗仔衫，及full gear黑蜘蛛俠派對cosplay服等等。在我購買洗牛仔褲專用液的時候，無意發現了這個工具︰這個名為「remekun」（即「remake君」的意思，懶係cute），是一個專門用來整殘牛仔褲等衣飾的物體，以customize vintage效果。包裝紙背後清楚介紹了用法，如何製造披口、貓鬚及走線效果，總之講到天下無敵。

問題是我由細到大勞作天份甚低，加上呢舊嘢成劈泥咁，完全冇辦法說服我俾錢。1,260yen事少，搞「wor」條牛/對鞋大鑊。DIY精神我一向唔buy，真係俾你刮兩刮就掂，人地LVC仲使開門做生意？

買得最開心，始終還是鞋帶。Tokyu-Hands齊備各類各色鞋帶，必買是可以令Converse即時變hi-end的圓身幼鞋帶，雖然ABC MART都有，但Tokyu-Hands較易買到高筒用的150cm長度。

這樣買Audi才對

講開工concept shop，UT行過兩步就可以見到去年尾才落成、好勁的Audi Forum Tokyo。這個日本人稱之為「冰山」的建築，入面不時會搞大型宣傳活動，其中包括「Audi MUSIC meets ART」的live event。

假如有日自己買得起Audi，也希望能夠在如此有氣勢的總壇做大豪客，而不是像以前返九龍灣公司隔離那間所謂爛鬼showroom。由於座o野實在太型，禁不住走過對面街為它留影。（其實過對面睇Hysteric啫!!）

UT︰唔買都飲下

繼續第二日原宿，同行的友人說想去UT，心想橫豎來到都要看看Uniqlo搞甚麼大龍鳳。老實說，concept shop來講，UT算非常之狼死，那個鋪位、那個空間、那個裝璜，到抵一天要賣幾多件tee才夠交電費？

由於本人不買Uniqlo的Tee，全程純粹睇裝修，唯一引起我購買慾是限量別注的UT x 午後之紅茶，咁啱行到勁口渴，飲起來特別好味，最緊要還是可以大模斯樣在店內飲。最令人匪夷所思，是平時一向午後之紅茶當水飲的同事M，去到竟然一支都冇買，自稱冇興趣云云，你見唔到架氣水機咋?

勤奮好學者大戰麻甩仔音樂人

第二天行原宿，在Lad Musician隔鄰發現了一間叫Studious的新鋪（有幾新我唔知，總之我以前冇見過!!），看櫥窗掛出來的Tee，一眼看得出又是走value hi-end路線的，入去一睇，直情係睇住Hare來打。

總括來說，這間Studious的貨色比Hare手工及質地好一點，價錢貴一點，但款式看上去又cheap一點。基本上tee、西裝及shirt都物非所值，看不上眼，有興趣到試上身的只有一條質地顏色cutting明抄Lad Musician的黑色skinny jeans，雖然我穿得落，但那應該是我穿過最窄的褲，由於恐怕會危及身體，加上都要成11,800 Yen，還是學甄楚倩話齋，「試過也算擁有」算了（不過返來睇相，先發覺門口個Postman Bag幾靚喎---24,150Yen??唔好玩啦!!）。

Value hi-end服盛行，沒有我的支持的Studious前路並不擔心，叫人擔心是開在隔鄰本身已有點冷清的Lad Musician，人地殺到埋身，你o的衫又易抄，要諗諗計了。

我的相機在N.Hoolywood住了一晚

受了某幾位仁兄的洗腦，我決定一落機放低行李立即到N.Hoolywood走一趟。有幾急？我是搭的士去的! （事實上由赤坂去表參道，搭的士最化算最省時）去到表參道Hills的後街時，天已經黑晒，未去過都幾難搵，好彩我一早問定了尋找人肉指南針的方法----只要問附近任何手持白色公文袋的人士就可以了。結果在一位哥仔的指點下，我成功在收鋪前半小時到達N.H。

入到去，當然睇睇睇試試試買買買，但由於N.H那些個個貌似The Ramones的店員趕住收鋪的樣子，我急過籠與興奮過籠，竟遺失了帶去的數碼相機，仲要食完飯返埋酒店先記得。死啦，錢事少（因為我買了保險），翌日工作冇機用先煩。我肯定是遺留在N.H，也相信店員不會私吞，最怕是其他客人撻掉。

第二朝當然晨早11點去N.H搵仔，原本他們並不準時開鋪，但我聽見鋪內已經有人，便夾硬攝入大閘硬闖100%危險。那位正在吸塵（那間鋪竟然都要吸塵!!!）的其中一位The Ramones店員見到我時十分驚訝，但當我開口說「デジタルカメラ……」，他隨即點點頭，再施施然地在後面的木櫃拿出我的LX-2，當堂安心晒，阿Ramone仲送我出門口添!你話以後唔對N.H死心塌地都唔得啦!

Back For Good

大大話話已有兩星期沒有update這個blog了，原因之一是上月尾忙到嘔，其次當然是我去了東京。闊別東京一年，今次之旅適逢當地大減假，結果我有重新的領悟︰

-我以後不會再在非減價的季節去東京

-我以後不想在非減價的季節在東京購物

-我以後不會在非減價時在香港買某幾個牌子

-我以後應該在減價前早兩天到東京，試勻所有衫，然後在減價當天狂搶

總括來說，今次旅程頗完美，工作及購物都頗順利，我計畫要買的單品都幾乎全部買到，唯一有點失望是日本成衣的質地愈來愈差，可能大部份均是made in China的關係。

圖為新宿SHIPS的搶購盛況，真的，下次試試減價當日去東京任何一間BEAMS或者SHIPS或者United Arrows，你會發覺跟置身花園街沒有分別。