不要停留在20世紀

早幾年已一口咬定「日本已經再冇人識拍戲」（聽聞出色的編導人材都去了做game），從技巧、製作到意念，韓國強勢地從後趕上，相反日本拍出來的愈來愈似劇集，有時比劇集還差，所以《20世紀少年》拍不出水準是預左。

影片稱不上惡劣，導演成功交代故事已算功得無量，太似電視劇的弊病依然嚴重︰運鏡老土，打燈flat，敘事技巧渣，反映編導本身功力低，或者應該說是脫節、過時。

我絕對相信問題出於日本人過於執著的本性，攬住原著死唔放。改篇一部作品的最高境界，是令沒看過原著的人都可以看得動容。像《黑夜之神》，你不需要看過《蝙蝠俠》漫畫也會覺得很精彩；如《魔戒》，Peter Jackson為了令電影流暢、清晰、富娛樂性，冒著原著狂迷及全球「托學家」的喊打，大刀闊斧刪了不知多少人物及情節，讓觀眾在原著的最終精神上感動。

去蕪存菁的先決條件是以電影的方式去思考，脫離單單「將漫畫分鏡搬上銀幕」的層次，但日本人邊夠膽？

終於為國增光

拉丁佬同俄羅斯佬都出埋，今次《GTA》終於輪到我地中國人。系統首度移植NDS兼用上遠鏡視點，唔知玩唔玩得慣，如果變左tactics野就更加唔識玩，龍與鳳要明年一月先知。

可能你會嫌啲中國人角色樣設計得好核突，但唔怪得佢，如果你有去過NY唐人街，就知道其實已經畫得佢地靚咗。

Separated at Birth

四揀一

本人買褸一向唔手軟（如果買樓都可以咁就好），雖則話下個月去到日本唔會再買貴衫，但褸呢樣野好難避免，暫時候選有呢四件，諗住四揀一，未睇實物已經好難取捨。

Pledge MP Jkt（UL）
正︰相對地抵買，個色好靚。
唔正︰上季已經買左佢一件95%同款的；今季呢件質地渣渣地；好凍先著到。

Whereabouts x Wrangler Denim Jkt（UR）
正︰易襯，任何季節都著得。
唔正︰貴到冇譜，牛仔褸o者使唔使去咁盡？
P.S.︰其他牌子如BRING ON THE NOISE及Inpaichthys kerri都有類似款，但cutting冇咁得。

N.Hoolywood x Lee Jkt （LL）
正︰個色幾正，有收藏價值，相對地抵買。
唔正︰個cutting好七下，又係好凍先著到。

Discovered Pu Leather Jkt（LR）
正︰好鍾意個色，仿皮造得極真，易打理。
唔正︰仿皮來講標得好貴，呢個牌子全東京只是原宿Beams有賣，但我自己去親都唔多覺眼。

最唔正︰美國經濟唔知仲有沉幾耐，美元係咁跌即係yen係咁升，再變8算的話就只能買Hanjiro了。

When Bad Hair Happens to Good People

我開始發現呢個人係唔可以轉其他髮型的........

別開生面系列之二︰龍友東京主題樂園

筆者為善最樂，專門介紹好野俾大家，今次自問鍾意影相朋友留意喇 !

最近我發現一個極之嶄新、專為龍友度身訂造旅行團。呢個四日團賣點係有架妹做model俾團友影相，兩名架妹會換上泳衣、便服同浴衣（其實係類似和服衣著，各位龍友們唔好單睇字面）三個造型任影。旅行車又靚，又有廠景，包埋活動仲有抽獎、握手會同遊戲，車上又有小食，9,000蚊抵屌啦下話，斷估唔會係團友間自己握手同遊戲掛？

不過每條女只係俾你影15分鐘，成團起碼30人，未換鏡頭人都已經都走左，旅行社負責人笑騎騎話︰「啲架妹貴嘛!」阿負責人好興奮咁同我講佢會親自領隊，聲稱果啲架妹都係AV黎，話依家個團已爆爆地，仲有鬼佬報名（我好懷疑個鬼佬唔識睇單張啲字以為係叫雞團，不過去到班團友都應該會出去搵食，anyway），所以都係老馮果句︰名額有限，欲免向隅，請從速報名。

Best Of The Month

一直很喜歡Sonic Youth的《Goo》封套，早前在M介紹下才從《Hugh》知道設計封套的藝術家叫Raymond Pettibon，Blag Flagk大部分封套都是出自他的手筆。幾日前見到公司的同事帶住一個《Goo》的環保袋，原來是Marc Jacobs Summer 08 Show的禮物，同事見到我喉擒的樣子爽快地說︰「俾你啦，不過用過噃!」已經用了好幾天，如果襯埋件《Goo》Tee出街會唔會好爆?? Anyway, a million thx to Michelle!

然後是等了好久的iPhone 3G，為了等她我三年來沒有換過電話。果然名不虛傳，簡直是史最偉大的gadget!!!以後真的可以唔帶袋出街仍然有電話用有歌聽有機打有相睇有網上有戲睇。

最後是N Hoolywood的e-Mook，當然不是為了件tee而買啦，不過可穿性實在高過上次《Dazed n Confused》果件好多! 這本特集真的很詳盡，08 a/w、standard以至under summit wear系列完全大解構，稱得上是NH的聖經，因此貴貴都買左先，況且都唔係好貴。

進場時請對號入座

我同人講我係劉美君fans，結果個個當我流，不過fans未必冇樣睇，所謂相由心生，例如我身邊一位很喜愛草蜢的朋友，外貌真的有幾分似蔡一智；而另一位朋友每次看不同的演唱會，更總會應景打扮入場，千變萬化十足cosplay。

最近英國就有位攝影師找來了一批死硬fans做model出影集，睇個look你又估唔估到佢地偶像係邊位？（難度由上至下）。

上海小龍蝦

再到上海幾天，可以告訴你現時當地最流行的食品並非小籠飽，而是小龍蝦。

友人說這是近兩三年才在上海興起的，以前小龍蝦（即是crawfish）是無人吃的，但現時已發展至街頭巷尾總有一間。吃小龍蝦是種頗高消費的享受，28人民幣一斤上海人一次可吃個四、五斤，已經是普通工人小半個月人工了。

香港的朋友千叮萬囑叫我去到一定要試，但我出發前道聽途說︰「果啲小龍蝦好污糟好毒架!」，另一同事更誇張︰「果啲小龍蝦食垃圾架!」，令到腸胃差近年又懶健康的我聞之變色，加上烹法好似好毒︰就是將小龍蝦放入一鍋油汪汪麻辣滷汁入面烚，果兜野應該比我平時認為是不潔的打邊爐湯，污糟好多倍。

結果盛情難卻，我在上海三天吃了兩餐小龍蝦，當地的友人說︰「不要擔心衛生，現在的小龍蝦都是養的。」但我實在懷疑︰是在那裏用甚麼來養？不是連朋友都不信，而是對內地食品真的沒信心。雖然係好好味，但看見很多小龍蝦腮部都有點灰灰黑黑的，我始終一邊吃一邊驚。

如果你真係有心食，可去到有「小龍蝦一條街」之稱的壽寧路，質素味道較有保證（當中以香島吧人龍最長）。那兒還有露天燒海鮮，個人來說比小龍蝦更鮮味吃得更安心，而小籠包都有得食，不過好唔得。壽寧路好易認的，因為成條街地下有三吋厚的油積，究竟點解就自已諗下喇!

買條Dickies都一鑊泡 Pt. 2

承接上集劇情︰我在東京試過了接近10條Dickies及疑似work chino，包括1. Dickies x American Rag Cie的M碼，結果又是細碼太窄中碼太闊這種令人激心的情況；在Freak's Store試了第一代的Low Rise版，結果原來闊到飛起；在Jeans Mate試了Low Rise Smart仍然係比想像中闊好多。

當中也試過不少代替品︰例如Gap的Extra Slim Fit Chino，Wyman著就可能slim；在Freak's Store隔離鋪有Ciaopanic的Ciaopanic x Wrangler，質地硬到界啫；在STUDIOUS試過DEVOTION的出品，cutting好靚質地還可以，問題是唔會俾1,4175 yen買這些4線牌子；算啦貴少少買Whereabouts但去到只賣剩短褲版，但好似來季繼續出；在原宿CANNABIS有CANNABIS×Dickies，標得貴之餘只有黑及灰，我要卡其色呀!!

結果，我在臨離開東京前的1小時，在新宿nano・universe GROUND FLOOR終於找到了nuGF x Dickies（左圖），先試S碼都係超窄但比American Rag Cie那條舒服，再試M碼則明顯太大。再著住條S做出各種測試包括行企坐低，當時覺得窄身程度應可接受，由於冇時間再搵再睇再試再考慮，在「仲唔買就冇Chino著」的壓力下終於惟有俾錢。返到來香港，唔知肥左定點，個hip位窄到痺（真係個pat感到麻痺!），白白擺左幾個月最近終於決定放售。

你有冇見過人咁七買同一款褲都會買錯兩次!! 打開今期《Popeye》有頁介紹Dickies，6條當中我已經買過兩條，但仍然搵唔到啱心水仍然冇得著出街。

天無絕人之路，Dickies自己又推出最新型號名為Low Rise IVY（右圖），是Low Rise Smart的修腳變種，聽個名都知係食 Ivy/Preppy/ American Trad條水，價錢只是8,400 yen，沒奈何地已成為10月之行鎖定目標之一。

一係唔review一係一炮過之其4︰toe

我是在演唱會幾天前才認識這隊樂隊的，但在YouTube看過他們的片段之後決定非去看不可。

Post-rock與math rock向來不是自己杯茶，然而toe音樂中的力量及所表現出的美態，卻是筆墨難以形容的，他們在台上的技術，更是超越了人體極限，這一點是當晚所有欣賞的朋友都為之讚嘆的。尤其是鼓手柏倉隆史的昇天失神，如果玩音樂可以達到性高潮，大概就是他這樣子了。

到場後見到全場爆滿針插不下，散場時紀念品攤位人頭湧湧，很替負責主辦、收T Shirt錢收到手軟的M感到欣慰。

一係唔review一係一炮過之其3︰Alicia Keys

相信你也試過︰有些女孩子，是寧願遠觀的，本來印象滿分，開口說話認識之後感覺就變質。

自從MTV Unplugged打後所推出的作品，再跟她做電話訪問，已知道今日的Alicia已不是我當初起喜歡的那個她了。當然她依舊是才華橫溢，但出道時那種不吃人間煙火的純情氣質，早被要跟Beyonce一較長短的歌精舞勁diva級氣派所取代。入後台見了面之後更加後悔，怎麼你會如此世界女？早知寧願唔見。

縱使如此，這個live仍然是我最期待的，因為她上兩次來港演出我都去了旅行。結果實在很精彩，Alicia無一刻欺場，也看得出她下了很多苦功蛻變成如此一個面面俱圓的entertainer。

但始終已不再是我當初喜歡的那個她了。

一係唔review一係一炮過之其2︰Akon

不記得那個rapper講過，無論是新仔玩又好，天王玩又好，所有Hip Hop演唱會的形式都離不開一條麻甩佬在台上成晚口噏噏。

這個觀點我很是認同，因為除了「make some noise」（中間可加入「mothxx fuxkin'」做助語詞）及「put your hands in the air」（也可加「mothxx fuxkin'」），上至Kanye West下Lloyd Banks他們都想不出甚麼其他台詞。Akon當然沒例外，不過他勝在落力通場跑，大熱作也多，最重要還是當晚promoter當party去賣飛，吸引很多索女入場。但我全晚只敢影Akon，因為我怕羞。

一係唔review一係一炮過之其1︰Stereophonics

看Stereophonics讓我想起自己在英國讀書時，獨個兒冒著寒風從宿舍走25分鐘到livehouse，然後一個人拿著啤酒孤伶伶捱過那些難聽的垃圾supporting acts，苦等兩句鐘盼心儀的樂隊上台那些日子。

不，Stereophonics不是那隊心儀樂隊，而是那些垃圾。多年來我認定這樂隊名過於實，只有那些讀大學的麻甩仔在pub飲大兩杯攬頭攬頸才會覺得好聽，是名副其實的ladrock。但這班客仔在英國人數之多，已足夠令Stereophonics張張碟都賣No.1了。

看完他們的live依然沒有改觀，這隊垃圾無才華、無好歌、無特點、無進步，假若不是在場內遇到幾個朋友（其中一個悶到走出去大堂hea），我真的不知怎撐足全晚。

一個別開生面的群星演唱會

不少朋友投訴香港的演唱會愈趨公式化，只是他們沒有留意其他選擇罷了，例如這個由某化妝學院舉辦的化妝比賽暨catwalk表演暨image girls/boys選美暨演唱會，就是其中一之。

首先擔任司儀的有影壇奇葩梁焯滿，他跟顏千汶拍戲你睇得多，做司儀實在難得一見。另一位有線旗下的余思敏在界人氣甚高，並有「翻版胡杏兒」之稱，網上討論區常有「余思敏至廢金句 」題目，與梁焯滿應會擦出火花。

至於掛頭牌演唱的是戴辛尉，由於其父是香港音樂教父戴思聰，加上其姊戴蘊尉有金曲《我係小忌廉》，如當晚戴辛尉能夠代為演繹，已經值回票價。其他歌手方面，有在網上始終找不到其資料的華籍男星Alan Freedom，以及Yeti與Kenneth兩位新名字，相信有期待驚喜。另外大會又邀得「小室徒弟」Zoie 譚凱琪擔任評判，認真唔野小。

這個在尖東日航酒店的表演（不是鳥巢啊!!），唯一缺點是票價太貴，要收$250，我認為入場者獲大會回贈$250現金，再包自助餐，就合理得多。

「黑、經文、其他」

近日在雜誌上認識到濱口健這位日本藝術家，生於1972年長崎的他，擅於繪畫類似空山基的70's寫實洋女裸體Pin-ups。由04年起濱口開始創作名為「黑、經文、其他」的系列，繒畫洋女的SM圖像再加上般若心經的經書法，創得來咸濕，詭異得來有型。最近他在新宿展出了全套276張作畫，十分壯觀。

玩物喪志

有聽過《兇群出洞》 (Willard) 這齣戲嗎？講主角是自閉變態佬，能夠控制老鼠咬人（甘國亮主演的蛇殺手好明顯照抄），那為甚麼世上有這種變態佬呢？答案是因為他們小時候經常去IKEA買玩具玩。IKEA 不單有恐怖死老鼠公仔供小朋友選購，還有甩眼曱甴、蜘蛛及穿上粉紅色襪的女性斷肢公仔等等。自此每次讀到北歐有禁室培育狂魔的新聞，我都不覺得出奇。

汪!!

「未見過狗識睇說明書咩!」

買條Dickies都一鑊泡

近一年打開各大潮流雜誌，你會發現Dickies成為了必要不可欠的定番單品，不單連野口強都穿上Low Rise版襯N(N) Boot出席Paris Fashion Week，就連各大Select Shop都推出自家collabo的Dickies Work Pant，上ZOZO search 「Dickies」一字，就可以找BEAMS、時Shirazu、甚至SHIPS再xGRIME EFFECT的collabo，由剪裁顏色細部位五花百門，令人眼花撩亂。

當中最搶手，莫過於號稱每季都出、一出都賣斷的Dickies x American Rag Cie Work Pant (左上圖)。本人去年曾經擁有過一條卡其色的，的確由cutting至質料都無懈可擊︰極細身剪裁、褲內邊的繡花細部位（右上圖）、全黑色的拉鍊，造工叫我愛不釋手。只有一個遺憾︰就係我唔啱著，訂細左個碼。FUCK。

終於唯有割愛予一位啱著的友人，結果？佢愛條褲要愛到再訂多條黑色!月前我托另一友人為我們在日本代購，但今季卡其色已經soldout，我友人條黑就幸運有貨。點知收貨後，發現今季條褲質量大插水，不單布料渣咗好多，全黑拉鍊冇咗，仲要加埋價，算點先？

另一邊廂，Dickies近日將其自家Low Rise版作出改良，演變成Low Rise Smart Work Pant（下圖），cutting其實抄足American Rag Cie，細部也比較Hi End，最仲要是價錢平一截!! 點知Rag Cie近來又返翻貨，叫人過兩日去到點取捨啫？不過最近自己對灰色都甚有好感，大有可能各來一條，返來慢慢著下比較。

又不過，曾經見過Men's Non-no有Dickies x nano‧universe，好似仲靚（記憶定價是再高一點），另外還有Gap的Extra Slim Fit Chino，真係要好好身親比較衡量。

算吧，首爾

首爾，在叫做漢城的時後，已被我列入「自己俾錢唔會去的城市」之一，結果今次去完，更變成「唔使錢都唔會去」。

明洞沒錯是比以前像樣，又有American Apparel，但一如以往，我在那裡逛到腳斷，捱不到一個鐘頭，冇野睇/冇野食/冇野買的情況依然很嚴重。因為同行的友人想買CD，沒辦法下我提議去Coex Mall，結果再訪這個號稱最首爾最大的商場，我還是捱不到一句鐘。在那裡食飯，我見識了一個所有店鋪都是賣同一種食品food court。

比較impressive，是去了聽聞已久的宏大，果然靚人靚景，結果我們連續兩晚都去了那裡，搭了很貴的士。當然，我相信狎鷗亭仍是去得過的（雖然每次頂盡捱兩個鐘），但今次同行的友人不是那種mood。

最滿意是酒店房的觀景，對正南山塔，有晚太無聊，自己玩拍攝夜景。

再加上另一些原因，首爾，我還是覺得，「以後最好都不要再去了」。