築地

假如不是被首次遊日的同行友人老屈，我自己打死都唔會晨早起身搭半粒鐘車去築地食壽司。結果同想像一樣，個市場又濕又污糟，最出名嗰兩間門外勁打蛇餅（其實都多日本人，不過佢地排吞拿魚飯店），仲要全部都係七嘴八舌港客，呢啲嘢我喺香港仲受唔夠? 最恐怖，就是睇見「同胞」啲超級侯擒樣︰「哎呀終於有人食完出嚟!」、「我入去一定要食N件海膽」等等，總之失禮到極點。

我去到塊面當然黑到冇朋友，好彩︰1.原來唔使等好耐，其實愈早去愈要喪等，9點去預等兩粒鐘，我11點去只需要等半粒，我走時12點完全唔駛等，但若你堅持愈早愈「新鮮」咁冇得好講；2. 真係幾好食，壽司超肥超大舊，不過好遊客feel，有晒英文餐牌，全店港客大聲廣東話高談闊論shopping戰績，總之唔好期望有地道風味；3. 築地啲紀念品店舖都幾有特色，例如有多款依家港女好興的pattern水鞋，心口印住大大個「魚」字嘅tee，吞拿魚匙扣等，最正係有幾件勁new rave嘅閃jacket。當見識下囉，但以後唔會再去。